सर्वोच्चको फैसलापछि नयाँ पार्टी खोल्दै मन्त्री त्रिपाठी, अन्य दलका सांसदहरू पनि आउने

  • सञ्चार लाइभ प्रकाशित : February 22, 2021
  • SancharLive

 स्वास्थ्यमन्त्री हृदयेश त्रिपाठी नयाँ दल खोल्ने तयारीमा लाग्नुभएको छ ।

२०७४ को निर्वाचन अघिसम्म तत्कालीन राष्ट्रिय जनता पार्टी नेपालमा रहनु भएका त्रिपाठीले सूर्य चिन्हबाट निर्वाचनमा सहमागी हुनुभएको थियो । सूर्य चिन्हबाट चुनाव जिते पनि आफूलाई स्वतन्त्र सांसदको रूपमा चिनाउँदै आउनुभएका त्रिपाठीले फागुनभित्रै नयाँ दल दर्ता गर्ने तयारीमा रहेको बुझिएको छ ।

२०७४ साल बैशाख ६ गते मधेश केन्द्रीत ५ वटा दलहरूबीच एकता भएर राजपा गठन भएसँगै असन्तुष्ट बनेका तत्कालीन तमलोपाका सहअध्यक्ष हृद्येश त्रिपाठीले आफूलाई स्वतन्त्र राजनीतिक समूहका रूपमा चिनाउँदै आउनुभएको छ । पछिल्लो समय ओली सरकारको स्वास्थ्यमन्त्री रहनु भएका त्रिपाठीले नयाँ दल खोल्नका लागि विभिन्न व्यक्ति तथा समूहहरूसँग छलफललाई तीव्रता दिनुभएको छ ।

मन्त्री त्रिपाठी तत्कालीन तराई मधेश लोकतान्त्रिक पार्टी (तमलोपा) र अन्य दलहरूभित्र रहेका असन्तुष्ट मधेशी नेताहरू समेटेर नयाँ दल खोल्ने तयारीमा लाग्नुभएको हो । अहिले देखिएका राजनीतिक दलहरू भन्दा फरक देखिने गरी त्रिपाठीले किसान तथा साना व्यवसायीको हकहितलाई जोड दिने गरी दल खोल्न लागेको बताइएको छ ।